"Apple” korporatsiyasi rahbari Tim Kuk 2011-yil yakunlariga ko‘ra Amerikaning eng katta maosh oluvchi top-menejeri sifatida tan olindi. Bu haqda "The New York Times” xabar bermoqda. U o‘z ishi uchun aksiyalar ko‘rinishida jami 376 million dollar mukofot puli olgan.

Qayd etish joiz, Kukning haqiqiy oyligi ko‘p ham katta emas – 900 ming dollarni tashkil etadi. Biroq kompaniya qimmatli qog‘ozlari ko‘rinishidagi bonuslar unga kuniga bir million yoki soatiga 42 ming dollardan pul ishlab topish imkonini bergan.

Kuk "Apple”dan olgan aksiyalarini ikki urinishda sotishi mumkin – birinchi yarmini 2016-yilda, qolganini 2021-yilda. Hozir uning aksiyalar paketining bahosi 634 million dollardan oshib ketgan.

Bozorda o‘z kapitalizatsiyasi bo‘yicha jahonda yetakchi bo‘lgan "Apple”ning muvaffaqiyatida, tahlilchilarning fikricha, Tim Kukning ham katta o‘rni bor. U 2011-yilning yanvaridan korporatsiyaning asoschisi, xasta Stiv Jobs o‘rnida ishlagan bo‘lsa, Jobsning o‘limiga bir necha oy qolganida – avgust oyida "Apple”ning rasman rahbariga aylangan edi.

Amerikaning yirik korporatsiyalari rahbarlari 2011-yilda o‘rtacha 14,4 million dollardan ishlab topishgan. Eng katta maosh oladigan menejerlar ro‘yxatida "Oracle”da ishlovchi Larri Ellison ikkinchi bo‘lsa (77,6 million dollar), "JC Penney”dan Ronald Jonson uchinchi o‘rinni (53,3 million dollar) band etgan.