Toshkent "Bunyodkor” klubi 2008-yilgi OCHL g‘olibi, Yaponiyaning "Gamba Osaka” klubini mag‘lubiyatga uchratdi. Uchrashuvda 3:2 hisobi qayd etildi. O‘yin "Sport” telekanali orqali to‘g‘ridan-to‘g‘ri namoyish etildi.

"Gamba Osaka”dan Shu Kurata va Xiroyuki Abe gol urgan bo‘lsa, Kamoliddin Murzoyev, Lutfulla To‘rayev hamda Anvarjon Soliyev tomonidan urilgan gollar "Bunyodkor”ga g‘alaba keltirdi. Yaponiyada bo‘lib o‘tgan birinchi davra o‘yinida "Bunyodkor” 1:3 hisobida imkoniyatni boy bergandi. O‘sha o‘yindan so‘ng toshkentliklar ustozi Mirjalol Qosimov hakamlar ishidan norozi ekanligini bildirgandi.

Ta’kidlash joiz, "Gamba Osaka” Toshkentda to‘p surgan ilk yapon klubi bo‘ldi, "Bunyodkor” esa Yaponiya jamoalarini mag‘lubiyatga uchratgan ilk o‘zbek jamoasiga aylandi. Ushbu uchrashuvda Kamoliddin Murzoyev OCHL-2012dagi o‘zining uchinchi golini urgan bo‘lsa, Lutfulla To‘rayev hamda Anvarjon Soliyev uchun bu gollar musobaqadagi ikkinchisi bo‘ldi.

Guruhning ikkinchi uchrashuvi Avstraliyada bo‘lib o‘tdi va unda "Adelaida Yunayted” Janubiy Koreyaning "Poxang Stilerz” jamoasini 1:0 hisobida mag‘lub etdi. Ushbu natijalardan so‘ng "Adelaida” 9 ochko bilan guruh peshqadami, "Poxang” va "Bunyodkor” esa 6 ochko bilan guruhning ikkinchi va uchinchi jamoalariga aylanishdi.

4-tur uchrashuvlari 2-may kuni bo‘lib o‘tadi. "Bunyodkor” "Adelaida Yunayted” mehmoni bo‘lsa, "Poxang” o‘z maydonida "Gamba Osaka”ni qabul qiladi.