Londonning "Chelsi” jamoasi Yevropa Chempionlar Ligasining amaldagi g‘olibi – "Barselona”ni mag‘lubiyatga uchratib, musobaqa finaliga yo‘l oldi. Ushbu jamoa o‘rtasida 24-aprel kuni "Kamp Nou” stadionida bo‘lib o‘tgan javob uchrashuvi 2:2 hisobidagi durang natija bilan yakuniga yetdi. "Sport” telekanali uchrashuvni to‘g‘ridan-to‘g‘ri namoyish etdi.

Uchrashuvda hisob 35-daqiqada kataloniyaliklar tomonidan ochildi: "Barselona” yarimhimoyachisi Serxio Buskets, Kuenkaning to‘p uzatishidan so‘ng, bo‘sh qolgan darvozani ishg‘ol qilib, jamoasining hujumkor kombinatsiyasini muvaffaqiyatli yakunladi. Shundan ikki daqiqa o‘tar-o‘tmas, "Chelsi” sardori markaziy himoyachi Jon Terri maydondan chetlatildi. U o‘yindan tashqari holatda raqib o‘yinchisiga nisbatan o‘yin qoidasini qo‘pol ravishda buzgani uchun qizil kartochkaga loyiq ko‘rildi.

O‘n kishi bo‘lib qolgan "Chelsi” 43-daqiqada o‘z darvozasidan ikkinchi golni o‘tkazib yubordi. Lionel Messi va Andres Inyestaning kombinatsiyasidan so‘ng ispaniyalik futbolchi "Chelsi” darvozaboni yakkama-yakka vaziyatga chiqib, to‘pni Peter Chex qo‘riqlayotgan darvozaning uzoq burchagiga joylab qo‘ydi. Taym so‘nggida esa "Chelsi” bitta javob golini urishga erishdi: Lempardning to‘p uzatishidan so‘ng Ramires to‘pni o‘z darvozasini tashlab chiqqan Valdes ustidan tushirib qo‘ydi.

Ikkinchi taymda, o‘yinning 49-daqiqasida uchrashuvning turkiyalik bosh hakami Junayd Chaqir himoyachi Branislav Ivanovich yarimhimoyachi Sesk Fabregasga nisbatan jarima maydonchasi ichida qoida buzgani uchun "Chelsi” darvozasiga penalti belgiladi. Zarbani amalga oshirgan Messi darvoza to‘sinini nishonga oldi.

Ikkinchi taymda zaxiradan maydonga tushgan "Chelsi” hujumchisi Fernando Torres o‘yinning asosiy vaqtiga qo‘shib berilgan ikkinchi daqiqada "Barselona” darvozaboni yakkama-yakka vaziyatga chiqib, Valdesni dog‘da qoldirdi. Shunday qilib, birinchi uchrashuvda 1:0 hisobida g‘alaba qozongan "Chelsi” final yo‘llanmasini qo‘lga kiritdi.

Finalda ingliz jamoasi "Real” – "Bavariya” juftligi g‘olibiga qarshi maydonga tushadi. Ushbu jamoalar o‘rtasidagi dastlabki bahs 2:1 hisobida nemislar g‘alabasi bilan yakuniga yetgan. Javob uchrashuvi 25-aprel kuni Madridda bo‘lib o‘tadi.