O‘zbekistonlik xonandalar aktorlarga qarshi to‘p surishadi. "Afisha.uz” sayti ma’lumotiga ko‘ra, futbol uchrashuvi 23-aprel "Jar” stadionida o‘tkaziladi.

Shou-uchrashuvda "Ummon” guruhi, Ulug‘bek Rahmatullayev, "Samo” guruhi, Alisher Fayz, Shohruhxon, Jahongir Poziljonov, Adiz Rajabov, Alisher Uzoqov, Javlon Shodmonov, Ravshan Hojiyev va boshqalar ishtirok etishadi. Taniqli aktor Murod Rajabov esa bosh hakamlik qiladi.

"Fond Forum” sayti ma’lumotiga ko‘ra, stadiondagi faol muxlisalar orasida Rayhon, Ziyoda, Munisa Rizayeva va o‘zbek estradasining boshqa yorqin vakillari bo‘ladi.

O‘yin chiptalari "Jar” stadioni kassalarida sotilmoqda. Chiptalar sotuvidan tushgan barcha mablag‘lar ko‘krak bezi saratoni bilan xastalangan ayollarni davolash, xayriya aksiyalari va loyihalari o‘tkazishga sarflanadi.

"Hayot uchun futbol!” deb atalgan loyiha "Fond Forum”, "Hayot uchun!” ko‘krak bezi saratoni milliy uyushmasi hamda "Kelajak ovozi” YTM tomonidan tashkil etilmoqda.