Jahon iqtisodiyoti 2011-yilda tabiiy va antropogen ofatlar natijasida 370 milliard dollar zarar ko‘rdi. Bu haqda dunyodagi eng yirik qayta sug‘urtalovchi kompaniya sanalgan Shveysariyaning "Swiss Re” kompaniyasi o‘zining yangi hisobotidama’lum qilgan.

Eslatib o‘tamiz, o‘tgan yilning dekabr oyida "Swiss Re” jahon iqtisodiyotining 2011-yilda turli ofatlardan ko‘radigan zararini 350 milliard dollarga yetishini taxmin qilgan edi. Biroq, haqiqiy natija prognoz ko‘rsatkichdan 20 milliard dollarga ko‘p bo‘lib, bu borada u tarixdagi yangi rekord natijani o‘rnatdi.

Taqqoslaydigan bo‘lsak, "Swiss Re” hisob-kitoblariga ko‘ra, 2010-yilda tabiiy ofatlar natijasida 226 milliard dollarlik zarar ko‘rilgan edi.

Ko‘rilgan zararning faqat 116 milliard dollari sug‘urta kompaniyalari tomonidan qoplangan, chunki xarajatlarning qolgan qismi sug‘urtalanmagan obyektlar hissasiga to‘g‘ri keladi. 2010-yilda bu ko‘rsatkich 48 milliard dollarga teng bo‘lgan.

Jami ko‘rilgan zararning 57 foizini (210 milliard dollar) 2011-yilning 11-mart kuni Yaponiyada yuz bergan kuchli zilzila va sunami keltirgan. Bundan atigi 35 milliard dollari sug‘urtachilar tomonidan qoplangan.

Taylandda 2011-yilning ikkinchi yarmida yuz bergan suv toshqini esa 30 milliard dollarlik zarar keltirgan bo‘lsa, bundan 12 milliard dollari sug‘urtachilarning zimmasiga tushgan.