O‘zbekiston mobil aloqa operatorlari o‘z tariflari 2012-yil boshidan beri ikkinchi marta qimmatlashdi. "Gazeta.uz” xabariga ko‘ra, "MTS-O‘zbekiston”, "Ucell” va "Bilayn” kunlik abonent to‘lovi miqdorini, shuningdek, ba’zi tariflarda kirish qo‘ng‘iroqlari narxini oshirgan.

"MTS-O‘zbekiston” sayti tarqatgan xabarga ko‘ra, 1-maydan boshlab "Dial’OK”, "Salom”, "Universal”, "Hammaga salom”, "Zvon’OK” tariflarida kunlik abonent to‘lovi 1 sentdan 2 sentgacha qimmatlashadi. Ayni vaqtda, "Hammaga salom” tarifida chiqish qo‘ng‘iroqlari 1,5 sentdan 2 sentgacha, "Zvon’OK”da esa tarmoq ichidagi qo‘ng‘iroqlarning birinchi daqiqasi 2 sentdan 2,5 sentgacha qimmatlashadi.

"MTS VIP” tarif rejasida kunlik abonent to‘lovi 5 sentga qimmatlashsa (25 sent), "Ajoyib suhbatlar”tarifida 16-apreldan tarmoq ichidagi chiqish qo‘ng‘iroqlarining birinchi daqiqasi 2, ikkinchi daqiqasi bir va undan keyin 0 sent etib belgilandi.

Shuningdek, 25-apreldan e’tiboran "Doimo aloqada” va "Erkin” tariflari rejalarida xizmat ko‘rsatish to‘xtatiladi, bungacha o‘z tarif rejasini o‘zgartirmagan abonentlar avtomatik ravishda "Zvon’OK” tarifiga bepul o‘tkaziladi.

"Ucell” operatori 6-aprel kuni Prepaid tizimdagi bir qator tariflar – "GAP”, "Ucell dunyosi”, "Yanada ko‘p suhbat”, "Online”, "Yaqinroq bo‘ling”, "Ish uchun”, "Ko‘proq so‘zlashing” tariflarida tarmoq ichidagi chiqish qo‘ng‘iroqlarining birinchi daqiqasida 2 sentdan 2,5 sentgacha qimmatlashishini ma’lum qildi, qayd etilgan tarif rejalaridan tashqari – "Tungi”, "Oson hisob” va "3G Modem” tariflarida kunlik abonent to‘lovi 1 sentdan 2 sentgacha qimmatlashadi.

"Bilayn” operatori esa 2-apreldan e’tiboran oldindan hisob-kitob qilish tizimidagi – "Barchasi o‘zimizniki”, "O‘zimizni odamlar”, VIP Lux”, "VIP Elite”, "VIP Beeline” va "Gold Pro” tariflaridan tashqari – barcha tarif rejalarida kunlik abonent to‘lovini 2 sent va 40 so‘mgacha oshirgandi.

Mobil aloqa kompaniyalari abonent raqamidan foydalanganlik uchun har oy 400 so‘m to‘lashi joriy etilganidan so‘ng, barcha mobil aloqa kompaniyalarining tarif rejalarida kunlik abononent to‘lovlari paydo bo‘lgandi.