ФИФА агенти Санъат Шарипов Сардор Рашидовнинг «Интер» клубига ўтиш масаласини шахсан клуб президенти Эрик Тоҳир билан муҳокама қилди.

Осиё Кубогидан ортга қайтаётган ушбу футбол агенти Жакартада Миланнинг «Интер» клуби президенти Эрик Тоҳир билан учрашди.

Норасмий ва дўстона руҳда ўтган музокара чоғида Санъат Шарипов «Интер» хўжайинига Ўзбекистон миллий терма жамоаси вингери Сардор Рашидовни яқиндан кузатишни тавсия қилган.

Ўз ўрнида Эрик Тоҳир ҳам бунга розилик билдириб, Сардор Рашидовни клубга кўрикдан ўтиш учун таклиф қилган.

Маълумот учун, Сардор Рашидовнинг трансфер ҳуқуқига эгалик қиладиган “Бунёдкор” клуби айни пайтда февралда бошланадиган Осиё Чемпионлар лигасига тайёрланмоқда.

Шу сабабли, Санъат Шарипов Тошкентга келганидан кейин “Бунёдкор” раҳбарлари билан учрашиб, Рашидовнинг “Интер” клубига бориши учун ҳар икки томонга қулай бўлган вақтни танлаши мумкин.

Бундан ташқари, Санъат Шарипов Эрик Тоҳир билан келажакда ўзаро ҳамкорлик қилиш, “Интер” клуби инфраструктураси билан танишиш, тажриба алмашиш борасида ҳам келишиб олган.

Эслатиб ўтамиз, Сардор Рашидов Осиё Кубогида Ўзбекистон миллий терма жамоаси таркибида барча 4 учрашувда қатнашиб, 2та голга муаллифлик қилди. Гуруҳдаги КХДР ва Хитойга қарши ўйинларда Рашидов захирадан майдонга тушган бўлса, Саудия Арабистони ва Жанубий Кореяга қарши ўйинларни асосий таркибда бошлаган.